澳門氹仔輕鬆遊2023

今日帶大家出發去澳門氹仔。因為係輕鬆遊，建議最好係一至五出發。我個人揀正午出發。路線係搭金巴由港珠澳香港口岸，至港珠澳澳門口岸。再乘搭巴士至銀河酒店。先去官也街醫肚。之後去食甜品及買手信。再搭輕軌去倫敦人酒店。回程都係金巴。

欣澳港鐵站搭B5巴士

如選擇搭金巴，先由欣澳港鐵站出口，行去B5接駁巴士，前往港珠澳香港口岸。過完海關，行去自動售票處買去澳門金巴車票。成人單程$65。全程約30分鐘。去到港珠澳澳門口岸，未出門口。先去便利店買澳門通$140。當中$40是按金。收葡幣、港幣及信用卡。但該店沒有增值服務。要去到澳門7仔便利店，便可以增值。張澳門通係用嚟搭巴士、搭輕軌及買小食用。出了大樓，可以找到前往澳門酒店的免費接駁巴士。

102X巴士

出咗澳門口岸，直接行去102X巴士站排隊。這架巴士主要去銀河酒店。去到銀河酒店巴士站下車。往左方向行至銀河東門East Wing。銀河東門閘口對正個行人天橋。上去對岸就係官也街街尾。有個葡式涼亭。繼續前往會有一間天后廟及北帝廟。如果是善信，請入廟參拜。

小飛象餐廳

首先去小飛象餐廳，點返個正宗葡國餐。葡國雞$88，馬加休炒飯$85，熱奶茶$30，總價$224。個馬加休炒飯好足料，食得出係隔夜飯。個葡國雞好熱。要得涼一點先好食。雞肉鮮嫩。食得出屬上等雞肉。杯熱奶茶好飲。個人建議唔好點甜品，留返個肚去官也街食甜品。

莫義記

三色大菜糕$30。我買咗之後行去小亭慢慢嘆。三種口味。個大菜糕有西瓜、荔枝及泰國大菜糕味。同食珍多冰啫喱差唔多。該店重有雪糕雞蛋仔$85，普通雞蛋仔$25及榴槤雪糕$68。人氣小食。榴槤愛好者萬勿錯過。

旺記咖啡

見到門口招牌有個大眾點評必吃宣傳牌，一定要入去買返支旺記咖啡$24。上樓上有雅座。個咖啡味好濃郁。環境好重五十年代澳門橫裝。懷舊打卡位。

必達士

最出名係個木槺雪糕$39。樓上設有雅座。個人建議大熱天時，最好上樓上雅座涼冷氣。情侶談心好去處。個木槺雪糕好好味，好重木槺原味。個雪糕有點像香港太空館，太空人食既入口即溶雪糕。不過呢款凍食，係雲呢拿味。

鳯城茶檔

疫情前後個土耳奇雪糕都係賣$30，我買咗個三色味。個雪糕口味有點似車呔味道。同傳統雪糕有別。最重要係個師父會整蠱個食客。身為食客點都要拍片記錄。

晃記餅家

晃記門口個招牌，掛咗個米芝蓮街頭美食奬。見到排哂長龍，點都要幫親。買咗兩盒腰果曲奇餅。$47一盒。手信最佳食品。

十月初五餅家

十月初五餅家曾贊助過電影十月初五月光。無理由唔入去。同樣買返兩盒腰果曲奇餅。$40一盒。手信最佳食品。

亞洲美食坊

買完手信，想去個廁所，或涼冷氣休息一會。建議去銀河酒店，有間亞洲美食坊。入嚟涼冷氣，或借廁所用，都係個好去處。最重要呢度有多國美食，當中重有免費WiFi。

坐輕軌去澳門倫敦人酒店

出咗銀河酒店東門，坐輕軌由運動場去路氹東。下車會見到永利皇宮，上行人路方向行去獅子頭MGM美高梅酒店，見到第一個路口轉左，便見到澳門倫敦人酒店後門。此處有接駁穿梭巴士開往港珠澳澳門口岸。但每天晚上八時正是最後班次。

澳門倫敦人酒店

澳門倫敦人酒店當中放置一比一英國巴士、一比一英國的士。將 Piccadilly Circus 個噴水池放置在酒店大堂。大堂外放置咗個大笨鐘。好多人打卡留念。入面間丘吉爾餐廳，出售一個葡塔$118。太貴。我只係水池投銀幣許願。

澳門倫敦人酒店邱吉爾餐廳愛麗絲夢遊仙境主題英式下午茶由網友Winus Shum 提供。一個又可以食又有魔術表演睇嘅下午茶，英式下午茶除咗可以打卡原來仲可以咁有趣👀食物味道都ok架😋真係唔hea仲有瘋帽子、愛麗絲同紅心皇后👑影相📸️

新濠影滙酒店

由澳門倫敦人酒店步行至巴黎人酒店。再由巴黎人酒店步行至新濠影滙酒店。成間酒店造型仿似蝙蝠俠葛咸城。但唔係入去玩。正門係102X巴士站。乘坐巴士開往港珠澳澳門口岸。買金巴票回港。

相關專欄：

澳門旅遊塔輕鬆遊2023